قصائد خالد ملاقي الشمري
بسم الله والصلاة والسلام على رسول الله ، اللهم صل وسلم على حبيبنا وشفيعنا محمد عليه أفضل الصلاة وأتم التسليم .. أما بعد
لتدوين قصائدي عبر هذا البرنامج علماً أن الترتيب عشوائي ولكن أقدم ماكتب هنا عام 2014 حتى هذه السنة 2024 ميلادي ، أخوكم خالد بن ملاقي الشمري …
بعزف الناي :
هب الهوا كن الهوا يعزف الناي
في ليلةٍ سادت سكون ولطافه
واستوزع اللي ساكنٍ في حناياي
يبغى القصيد وقلت مامن كلافه
هو ثورتي هو كبريائي ودعواي
اصخره لك ليين آخر مطافه
لو تسمعين الذاكره تدبك خطاي
ادور لهذي الرهافه ، رهافه
ادور لحبك غزل يربك عداي
واستمطره فوق الكثافه ، كثافه
ايه اضحكي انا معَ ضحكتك جاي
يامبسمٍ عوض سنين الكسافه
خلي عيونك صوبي وفي محياي
اخذ بها مع الشعور اعتكافه
استنطق اسمك كل ليله على شفاي
مثل العطش لازاد زدت ارتجافه
انت القصيد اللي كتبته ومعناي
ضابط شعوري في يديك انصرافه
انا بدونك كيف ، يعني بليّاي
تعلقت روحي معك بـ التفافه
خذني معك ولا تبقي من اشياي
اي واكسري وحدة قياس المسافه
بين القناتين اركنيني بمنفاي
اللي تمنثاها الحرير بضفافه
انا ادري انك ماتبي الا محياي
بس البلا قلبٍ ملْي بالمخافه
حتى الهوا لو مايهب!بعزف الناي
الليل مع ذكرك سكون ولطافه
الشوق :
قلل مجيّه لين بعّد عن الموق
وارجفّت من كثر التشفق واغنيه
من التعب كثر العتب نشّف عروق
ومن السهر دليت امنّي بماضيه
على مغيب الشمس لين اول شروق
صبحٍ تفتق في دموع المشاريه
يوم اقبلت عقب الجفا صابني عوق
ودلا لساني همهاته تخفيه
يوم ان ابو نوره تغنى عن الشوق
انشهد ان الشوق تفضح مواريه
على الله:
ان ضاق صدري من فعايل جنابك
خله .. على الله ضيقته واتساعه
لاني " تبيعٍ لك " ولاني اهابك
لاشك مالي بالمقفي طماعه
ان " رحت ولاجيت " يامرحبابك
فيني من الفقدان قوة مناعه
سلهم بعينه:
ان تزاعلنا رضينا .. وان تباعدنا رجعنا
اعشقه واللي خلقني ماخذا قلبي سواها
سلهم بعينه وضعنا اشهدانا يوم ضعنا
ضيعة اللي تضحك الدنيا من الضحكه معاها
صاحت تنادي:
شحت قرايحنا ليا دن مطلاع
واومت على حدب المحاني وراحت
كانت تفوح ونادره مثل الاشعاع
واليوم قل الخير وان كان فاحت
يازين شفّي من ورا عوج الاضلاع
عيت تجاذبهّ الليال وتناحت
صاحت تنادي يافتى وين الابداع
قلت انها في معركه واستراحت
وحنا لنا شعرٍ تمناه الاسماع
تسري به الركبان من وين راحت
سافرت :
سافرت قصدي افرح بشوف الاصحاب
اللي " اعرف " فيهم بياض السراير
سافرت والصدفه خذتني ورا الباب
فزيت مدري كيف والحلم صاير
حسيت بالراحه وارخيت الاهداب
حتى اغسطس صار يشبه " يناير"
كانت سحاب وصبح واحلام واعجاب
وشيٍ كذا يشبه ضباب وستاير
رجال مدري طفل ليه العب العاب
وكانت تكد الشعر " ليل وحراير "
أين الديار:
أين ديار ديار عشقي الاوحدِ
هل عاثت الاسفار فيه قليلا
اولم يكن بالقلب اقرب منزلٍ
ياليتني " لم اتخذه " خليلا
قد كان في امل الاحبة مسرفً
قد كان في الم الفراق بخيلا
ياعاشقي هب لي الخفوق مدججاً
مملوء في آلاحسان الا قليلا
سيضل ظلٍ استضل بظلة
ان طال مثل الظل ظل نخيلا
نحن الذينا اذا رضينا بكرةً
سرنا على درب الفراق اصيلا
نحن الذينا اذا عهدنا عهدنا
خنا العهود كأنها تأويلا
خنا ولازلنا بنهج محمدً
لايقبل التحريف والتضليلا
هذا ونحن نتبع خير الورى
ماذا ولو نحلف على الانجيلا ؟
في كل صبحٍ نستمدُ كذبة
ياعاشقي وكأنها ترتيلا
الموضة:
اوضاعنا بعد التقدم ماش حال ومش حال
مع اختلافات الزمن تبقى الثوابت ثابته
الحمدلله والثنا مرسي الاراضي بالجبال
وسبع المحيطات الكبيره سرها في ايته
على الكرم ورث الجدود تحثنا ياذو الجلال
جدودنا اللي" تكرم الخطار " امر لطاعته
ياما على العيرات هازو مجرهدات السهال
ماطب من جرد السهال تغز فيها رايته
الجود بالماجود لا.. جوده على الصعب المحال
بأمر الكريم تبسط العصب المحال بساعته
وحنا على نفس الخطى في نفس تقدير السبال
الله " وهبنا نعمته وكلٍ على " تربايته
ثورة تقدم بعثرت وجه الرزانه والهبال
سوات شقرا تابعه يارايحه يافايته
خبلٍ على كبر العمر وش عاد خلى للجهال
يمشي على الموضه مايين الناس في رضاعته
عفى الله:
عفى الله عن حبٍ توارى وصد وراح
توارى وصد وراح والهم بـ اضلاعي
ليا حلت الفرقى وخلي نوا المرواح
تصّعب لي حلول الامل والجفى واعي
مضى عام قبله عام ما خاطري منساح
سوا ليلةٍ واللي بعدها تجي اوجاعي
من اول رسايلنا توارد على الارواح
وتباطت رسايلنا على ذمة الساعي
اغوتني العزة:
ياطول حلمي واحلامي على المستحيل
ماواقعٍ " عشته " الا غير الاربع فصول
ان هبّت المعضلات اُقف وصبري طويل
وان كثرت المعضلات اثبت ولاني ملول
قزان " مالي مع العقّال " لذة مقيل
ولايرضي النفس اعذارٍ بليا قبول
شمنا عن الذل والهفوّه وصبرٍ جميل
في عالمٍ فيه تعتاش العفون الخبول
لقيت فـ الدرب من يملك ولكن بخيل
لا مكرمٍ ضيفه ولا شيف منّه فعول
وشفت الحريص ان غلطاته شغايا مسيل
تستادبه غلطته فـالارض عرضٍ وطول
وشفت المنافق ليا كبّر وصلى هزيل
عينه تزارق واذا كبّر وصلى كسول
وشفت الجبان الذي بالكرخ ماله مثيل
وان ناطح ام الكباير روعتّه الطبول
لو يقرب العاديات اللي يهاب الصهيل!
يبين في رجفة ضلوعه ولو مايقول
يارب انا ضايقٍ صدري ونعم الوكيل
من صاحبٍ قاطع الحسنى بليّا عذول
اعرف هماج المشارب واعرف السلسبيل
واغوتني العزه وعطّشت علي الذلول
لقيت عقب العجاف السبع دربٍ عليل
سايرت درب القناعه عقب كنت معُزول
مافي يديني عقب كثر المشاوير حيل
ولا على القلب بالاحلام قوة وحول ..
قهوة بدوي:
قصايدي من زمن جفت مشاربها
ولا عادني والقصيد احباب لا بالله
واليوم قامت ترقّص لي سحايبها
من شفت زولٍ لفى يشهد علي الله
سيف امرو القيس متركز بحاجبها
يوم اعترض في طريقي جاني وسله
وعيونها " يمّة " الامزان بارقها
وخدودها الورد والريحان والفله
والشعر كنه ليا فلت ذوايبها
قّهوة بدويٍ من المفواح للدله
عن المطر:
ايه انا انسان !
اسعد من مطر
المطر رحمة ونعمه وامنيات
المطر مايشبه ؟
الا للعطر
عطر مركن فيه كل الذكريات
يا اجابه خبريني بالاجابه
من قناعات
وقوانين
وثبات
كل انسانٍ ليا شاف المطر
شاف هيض
وشاف فيض
وشاف صبح
وذكريات !
ياوسع صدر السماء:
البارح الغيمه البيضاء سرت بدري
ولحقتها " بالسفر ضميان ومتيّم
يارب مزنٍ ترادم " يمته " حدري
يردني مثل ماكنت اول غليّم
اركض ولا ادري ومستانس ولا ادري
غيي على الصبح ولا الماطر الديّم
واليوم بالي من ادنى حاجةٍ كدري
ويثر قولوني واعاف النوم واضيّم
مقامي " اعزه وكرامتي " وقدري
ولا ارضى المهونه واعرف الصح واقيّم
يمكن خطاي ان صبري فاخته صبري
حتى القهاوي كفت لو مدها دغيّم
والغرو لو قال لي من هرجه الخدري
بعض الكلام وغدا في صدري مخيّم
ياوسع صدر السماء ليت السماء صدري
وساعها " مايضيق " الا ليا غيّم
يامجمل الذكرى:
يامجمل الذكرى ليا هبت انسام
لوني من الذكرى الجميله اعاني
تسري وراه اوهام واصارع اوهام
ارجي مجيك لي لو بالاماني
ابني من الاحلام في قلبي الام
انا بليت القلب ماهو زماني
والبارحه كثرت هناديب الالهام
وعاتبت فيها كل قاصي وداني
وخصيت ترفٍ تالي الوقت منلام
لاعاد ليل اعطيته ولا عطاني
كم لي وانا اسهر شوق وعروق تنظام
وحبٍ تمرجح بين عوج المحاني
ياساكنٍ كل عام بالصدر لك عام
يومك شهر ، شهرك علي عام ثاني
ياما سهرت الليل والناس نيّام
اعاني وتصبح دموعي معاني
القلب حب وتالي الحب الاحلام
الله يعين اللي مفارق اناني
كبار وعزاز نفوس ومن دمعة هيام
طاحو عزيزين النفوس بثواني
اسأليني:
اسأليني : دام هذا الليل مايعتق جليسه
اسألي وش بالثرى ، حتى اوصلُك الثريّا
أسالي عن جور ليلى يوم جن الحب قيسه
ايه اقول الحب ساسه هش من دون الجفيّا
أسالي ليه الذياب العاويه تبغى فريسه
اي واقول ان البشر وشهي بلا ردع وحميّا
واسأليني وش ورا القسيس واسوار الكنسيه
اي واقول الغرب مشروع اوله صار وتهيّا
أسأليني فليسوفٍ و بدوي حادي لعيسه
يعرف البير وغطاه ويعرف ابراج العليّا
أسالي عن كل شي الا عن قلوبٍ خسيسه
ذا غموضٍ لو كشفته ماطعنّا بالقفيّا
واسأليني ليه انا شاعر وليه انتي انيسه
اي واقول ان القلم دونك تهاديته وعيّا
والله ان حبه نزاعٍ طال لين احمى وطيسه
ماِر انا اللي مغتنم به من هناااك الى هنيّا
الصباح المنعش:
افتنتني بالصباح المنعش، انفاس الحبيب
وقمّت اغني " جادك الغيثُ اذا الغيث همى"
والله اني من زمان الاندلس حالي مريب
ومن زمن في قرطبه ، حالي مريب او ربّما
يوم شفت الجيد الاتلع ذايب ولكن مهيب
كيف ربي مد هالهيبه على عذب اللمى
وطرفها البارع سهامه باطشٍ رميّه يصيب
( ومارميت اذا رميت ولكن اللهُ رمى )
كم تمنيتك صباح وكم تمنيتك مغيب
كن ربي خالقك بين السحابه والسماء
شمريّك لاقضى تشرين الاول يستطيب
قوم ياذبحة كليب اللي حمى حد الحمى
بعض خلق الله:
تخالفت مع بعض العرب ليتني مرتاح
اثر بعض خلق الله عليها الجفى نعمه
يشوف ان نفسه واعي ومدرك ونصّاح
ياسبحان ربٍ وزع الصبر والحكمه
يحسب السوالف بالمجالس تجيب ارباح
وينشف عروق الناس لامن نطق كلمه
وياليته ليا جاب السواليف جات صحاح
وهي فاطرٍ تضلع! يشوف انها ولمه
ليا من لقيت اللي يجي طيّب ومزاح
هذا والله اللي يشرح البال في علمه
سيدي:
سيدي ماتشوف الليل والقمرا
طابت اوقاتك وماخاطري طيّب
اول العام مزن وليلةٍ غدرا
واخر العام لا ليله ولا صيّب
سيدي والقلوب الصارمه خضرا
والقلوب الرحيبة راسها مشيّب
والهنوف القديمة ماهي بقشرا
بدلت " ثوبها ياليتها " تغيّب
كانت العام ثيّب واصبحت عذرا
ليتها " باقيه " مثل اولٍ ثيّب
طولّت لاهيّه واهي بعد ادرى
ويلها استغفر الله موقف مهيّب
سيدي لاتنّبش عاثر الذكرى
والله ان الهنوف جبلّها طيّب
احذر تبين! خله مزنةٍ سمرا
البشر حطت الطيّب على الخيّب
جعلها من لهيب همومها تبرا
جعلها من لدنك الماطر الصيّب
صباح الظلام:
صباح الظلام اللي كسى العين مدري ليه
ليا من ذكرت اللي فراقه برى حالي
انا قبل يطري لي فراقه صباحي فيه
ولا عدت " اميزّ بين شوقي " وغربالي
مضى حول مدري دهر لكن انا هاقيه
وعسى مايخيّب هقوتي به وهو غالي
اغني قصيدي فيه وانهي قصيدي فيه
ولكن " كن القلب مستبرد " الصالي
يسود الظلام ويشفع الليل عن ساريه
طريقٍ " يوديني " ولا ادرك وش التالي
الا " ياحبيبي ليه " مر المحبه ليه
بفراقك ياكيف استطعم الحالي لحالي
بعد ماقريت ان المّلوح فقد غاليه
سرى في ضلوعي ياس ماجاء على بالي
الاماني:
اوسع من الكون كله في رحابه، الاماني
لو سريته تهت مابين الدروب السرمديه
اذكر اني قلت ياقل الصبر بين المحاني
والمحاني ضمت ام الامنيات العسجديه
اه صبحٍ طل ضوّه من ورا سور المعاني
واحتفيته من ثمان سنين بالقلب ويديّه
كل ماذعذع هبوبه جيته بقلبٍ اناني
ارسمه واعيش فيه الامنيات العاطفيه
كل ماجادت يديني قلت صح الله لساني
شاعرٍ ماني منزه من ذنوب ومن خطيّه
لو علي منّه الكلايف والعثاير مادعاني
تعصف الافكار به عصف الرياح الموسميّه
ان حويته زاد همي وان هجرته ياهواني
فرض اعفّه مثل ما اعف الهنوف الشمريّه
من مكاني جيت له والواقع اني في مكاني
وين ماراحت خطاي .. تردني للواقعيّه
من زمان الطيش وايام الفتوّه والغواني
كنت اشيل ذنوبي القشرا ورا طهر التحيّه
اه مليت " الكتابه " والتناغم والاغاني
ليتها فلت وطارت مع مطير الراعبيّه
لو مطير الراعبيّة ذكر القلب ورماني
في عناقيدٍ توارت من ورا ثاني ضحيّه
ليه هدم امنياتي ليه هو اصلاً بناني
الحطام اللي تبقّى لي دموع الجرهديّه
كنت حاتم ، كنت عنتر ، كنت وضاح اليماني
كنت غيمٍ يحتفيه وكنت له نجد العذيّه
راح ماكني سقيته لا بعد راح و نساني
كبرت الشرهه عليه وكبر معروفه عليّه
مايمر الليل ذكرى ليلة اطراف المواني؟
ماتناشى ذكرياته؟ مع رفيف العقربيه!
هو يشوف الغيم وجهي؟ او انا عيني تعاني
ليه اشوفه بالسحابه لاغدت بيضاء نديّه
ليه يطري بالاماكن والشوارع والمباني
فالسماء يوم ارتحل بين الدروب المهمهيّه
كم لي امنّي الخفوق اقول جاني ايه جاني
كني اللي " غارسٍ " بيديه جمره ، وبرديّه
يلعن امه يوم قفّى كنت اضحك، من تفاني
ماهقيت انّه " تقفى " من ورا مقلع طميّه
بس عاد ان المحاني ضفت كبار الاماني
والاراضي والجبال الشم والنجمه وضيّه
ابتسم للامنيات اللي لها ثوب اعتراني
كنها من فضل رب العرش تعطيني هديه
في رحابه زدت مكيالي عليه وبس يااااني
صرت احبه كثر ماخلا ابتساماتي رضيّه
اضحكي:
اضحكي يا ام المشاريه السنينه
ضحكتك تجلا من الفرحه دموعي
كن " ماهم عقبوهااا " والدينه
خالقه ربي بقايااا من ضلوعي
ماللاماني نهايات:
الله " من دربٍ وطيته " سهالات
الحب عن درب المخاطر غشاني
متجاوز حدوده اراضي ، سموات
من وين ماوجهت صوبه دعاني
يافاتنه" ماللاماني " نهايات
كل يوم امني النفس واسهر واعاني
الوي شماغي عند حد التنهات
متولم اجي لك سوات اليماني
ان كان باقي بالامل بس لحظات
يحييه حبٍ ضج بين المحاني
يافاتنه" ياقاريتني " بالابيات
كوني عزيزة مصر في شكل ثاني
وماني نبي الله احقر الملذات
قدي قميصي واسرفي بالاماني
غرور:)
ليا من المواقيف استحالت
تعرف الجدي وسهيل اليماني
من اللي بروسنا،العقل استمالت
سناعيسٍ … لنا فعلٍ بياني
وكحيل العين من عينيه سالت
دموعٍ كبّلت عوج المحاني
تعالت من شواريدي تعالت
شهرته مثل ليلى والغواني
وانا اذكر يوم هذرت بي وقالت
هذا الشاعر غروره شي ثاني :)
اييه طلي:
ياجميله شفتك براس السحابه
كل ماضيعت ادورّك بمحلك
ايه طلي واضحكي ضحكٍ يشابه
ضحكة الطفل اللعوب لمن يجلك
يهبآ حسنٍ عطاه الله مهابه
يرتهج من قدك الميّاس ظلك
ربي انصرني بلا قوس وحرابه
ودي بهمس المشاعر استحلك
لين احبك من هنا حتى السحابه
حبٍ مفصل على بعضك وكلك
:القلب الحزين
البدر ضاوي والهبايب تطرق القلب الحزين
واللي هنيّا في ضلوعي له اردد ياهلا
صبت سكينات الليالي من علو الفرقدين
زادت على هذي السكينة حضنها وزاد الحلا
كني قبل ماشوفها متحير وماني رزين
مرٍ صويب البين ولاّ مثل هتاش الخلا
في عينها المجد التليد، وبين حد الحاجبين
سيف الامام ابن الامام اللي فرّض حكم وولا
والمبسم الدّري لك لله صار فيني فرض عين
كل ماتبسم زاده الله حب واحساس وغلا
والشاعر اللي هام في اعجوبة الخلق الحسين
ماكنه اللي شاف غيره بين مردوم الملا
اللي مضى بالعمر لو دارت علي ذيك السنين
وقفت له وقفة قريبٍ يرتجي دفعة بلا
الشيخ الاكلح في ضميري يبكي لفقد الحسين
صلى على مكة وقلبه منتحي في كربلا
ماِر المهم اني لقيت اللي ملا غصني حنين
هذا هو العشق الصحيح ان لم يكن ولا فلا
قل للمطر:
وان امطرت قل للمطر يصبر شوي
نبي نفل صدرونا للسـحابه
نبي نسامر رايح المزن والضي
وناخذ من الامزان طيب ورحابه
واكتب بخشفٍ عانق الروح ياخيّ
اي والله ان اللي سكن به غدى به
عن حائل:
تبسمي ياعفيفه جرحي ادمى
وصبي علي من عذيات المخايل
مشتاق لك كم انا مشتاق واكمى
بالمربعانية … وعج القوايل
مثل مايروى الغصين ببلة الماء
ترويني النسمه بضلعان حايل
ابوها اجا وامها ياهنوه سلمى
عرقٍ نبض بالكرم والشك زايل
وهي انجبت للطنايا كبار الاسماء
مروين حد الهنادي بالدبايل
مانجهد الطيّب:
كريم " يابرقٍ " سرى ماتريّا
يرزم من المنشى رعود ومقانيف
صافيه هل وماعليه الكميّا
تذكر مقانيفه من السيف للسيف
يوم ان سحاب الصيف بالمزن عيّا
مره صدوق ومرتينٍ على زيف
مانجهد الطيّب كريم المحيّا
نشره على وده الطيب بالكيف
حد الثماله:
والله اني اعشقك حد الثماله
ياحبيبي والهوى دروبٍ عذيّه
عاد زينك! زينه رب الجلاله
بالعيون الخرس والنفس الرضيّه
ماتعدت فتنتك آية سلاله
بالعصور المقبلة والاوليه
اكتبك في شعر ولا في مقاله
اكتبك يافاتنه اغرب قضيّه
منهو اللي يعطي السارق رساله
محتواها شكر واعجاب وتحيّه
ان سرقت القلب اسرقني بداله
والله ان الشكر لحجاجك وفيّه
في عيونك سيف وامجاد وبساله
وفي خدودك وردة الروض النديه
وفي ثغرك الجمر! يذبحني جمااله
جمرةٍ ياهي من الخالق طريّه
وبلغي شعرك ليا مالت قذاله
مهرةٍ " تلفح " نواصيها بريّه
ياحبيبي اعشقك حد الثماله
من صدفتك والرياض اضحت عذيّه
لموضوع معيّن؛)
القصيدة " لالفتني " كنها اخت البلاش
ان سرت ياكنها تسرق من الجوف جهدي
يوم زانت لي وانا من بين ثادق والمشاش
استعنت الله وحطيت النظر يم الجدي
والله اني ماتركت الحلم من شان المعاش
حظ اوفر ، والملامه درب عوج وسرمدي
مير شفت ان النقاش احيان مايسوى النقاش
غيمةٍ وسط المحيط ارهت بغيثٍ و بردي
قالت تعال:
قالت تعال وقلت في خاطري جاي
انا من الله ودي اضمها حيل
اجحد على يسراي لاتشوف يمناي
هي بيني وبين الضلوع النواحيل
ابي تدوخ عيوني السود ، وشفاي
شفاي تستطعم حلاة ومناهيل
زوايا حلم:
كانت زوايا حلم : بعض امنياتي
اواه كم حملت نفسي كلافه !
اللي عليها العلم ، من هامشاتي
البس ثياب الحقيقه خرافه
ارسم طريقي لييين اوصل شتاتي
عشان اسوي بالطريق انعطافه
واسرق من اشعار العرب؛ مفرداتي
عشان محد يقول هالشطر طافه
اذكر يوم اني طفل ، ساعة مباتي
ابحث عن ابداعي وكانت سخافه
وقريت عن قصة جحى : ياغناتي
وكذا احسب اني وزير الثقافه!
حتى وصلت لمرحلة في حياتي
اشقق ثياب الندم والحسافه
واقول ياحلمي كذا ، يوم تاتي؟
هيا بنا ، خارج حدود المسافه
كن السحاب:
صبحٍ من الله … يجلي الخاطر العمس
كنه على صفر " المعاميل " فوٌاع
وكن السحاب اللي يشتت سنا الشمس
بنتٍ " تصك البسمه " بروس الاصباع
انا الشاعر :
ثلاثيني وصلت العمر قد شفت البنات ألوف
ولاغيرك رضى قلبي عليه وحرك اشجاني
ظروف الوقت ماترحم ظروفٍ في ظهور ظروف
شبابي راح مابين الظروف وزمرة الجاني
وشوقك يارهيف الخد يا ام الضامر السرجوف
نسيمٍ من ليالينا التلاد وطيش قيفاني
وانا الشاعر وانا الباهر وانا المشتاق والمكلوف
ادون في رحاب الامنيات ودفتر احزاني
فقدتك وانكسر ذاك الصباح وجيت له مكتوف
تعنّزت القصيد وشالني من صملته عاني
اذا شفت العيون وقلت جواها سفوح طيوف
طرت لي ديرةٍ كم لي اسيّل لجلها امزاني
كتبتك من ثمان سنين لو ان الشعر محفوف
ابشرب من ثغرك العذب ابيك تعيش باحضاني
على حبك ابشهر للعدا والهم سبع سيوف
معارك خضتها كم صرخةٍ باشكال والواني
مرامي والمرام الصعب احبه والعيون تشوف
كأنك من جنان الخلد ولا كوكبٍ ثاني
اتأملك:
الاماني
كوكبٍ يسبح لحاله في فلك
يذهلك فيه التفاني بالدقايق
والثواني
آه ياطول الطريق وفالطريق!
اتأملك
من وين جيتيني
يازهرة سنيني
ماكني الا قبل حبك بقايا
انثر شتاتي والمه في قصيدي
تتذكرين الصيف؟
اغسطس
وحر وشموس
صارت مثل اجواء جنيف
انفاس غيم ووردتينٍ
بالرصيف
وفي عيوني الارصفه!
صارت مثل لبس العروس
ياسويرقي وينك
عيني على عينك
كل ماتزينتي
بلياااه يازينك
بس الهوى بحر الاماني والاحلام
ماتذكرين الفلسفه بالاماني ؟
والاماني كوكبٍ يسبح لحاله في
فلك ..
أتاملك وسط الطريق والمشكلة مامن مضيق
فضاء واوسع من فضاء..
وانا الوحيد
أتأملك!
بصحى:
ابصحى عن شتات الامس
تعبت اصفق ثقال الخمس
ابصحى
وانثر اوراقي
ابصحى من لهيب الشمس
وافكر!
وش مضى وش كان
انا من مامضى للان' اعرف اني كثير الصمت'
واستنكر!
وامد لساقي الاحزان' شعري فيه ماعلمت'
واتذكر..
انا القاضي
وانا الخسران
والراااااااضي
انا من فتش حتات الرماد وضرته جمره، انا من يهدي السكر قصب
لو قهوته مره،
وافكر ليه انا تايه!
"ابصحى " باقي افكر
وابفتح بابٍ
مسكر
وامر بقارعة ذاك الطريق اللي يوديني ،
الى احلامي الاولى
الى ضحكاتي الاولى
ولو يقدر يرجعني الزمن!!!
برجع سنة اولى'
طفل يتوهم احلامه ، ولايشكي من الآمـه كبير همومه الكبرى!
من الاستاذ واقلامه…
ابصحى واسترد الامس
واغني في لهيب الشمس
ولا اتذكر الاوهام
ولااتذكر خطوب العمس
وابي اقرى كتاب الحب:)
يخرب بيييت كل الحب
لـ أديب القاهرة لاقال '
انا المتنيييل الغلبان؛)
وابي اقراء
وانا اقراء
ابي يطري علي همي ،ولاهمي ابي اضحك
وافتكره!
جدار الصمت واسواره على فكره انا اللي كنت..
محتكره
وابتذكر سنيني كيف ، طويت الياس واوهامي
وبالاحرى
ذبحت ايامي السود الثقيله هم " وابترنم " واغني لا ام كلثوم
وابتكلم'
انا اول كسيرٍ مر بالتاريخ"
والذكرى
يحول كـل اوهامه سجع!
ويغني لذكرى …
كنت عاشق :
ابيقور من قبل العجم تؤمن بياسوع
عن الساسه الحكّام والعلم له معبا
حدث علم لو انه لا مقري ولا مطبوع
بعد الف عامٍ ثوّر الشعب فَ اوروبا
جميع الموارث مرّها فيض ولا جوّع
ولا تضيع لامنها غدت طيّبة مربى
ولا يردع التايه سوا الحكم بالممنوع
خطيرٍ على اللي كان بالعرف يتنبا
انا كنت عاشق فآتنه عفتها باسبوع
وهي " فآتنـه " لكنها رثـه وجربا
الا ياحفيدي ماقدرت احفظ الموضوع
مثل تركي بن حميد وعبيد والجربا
خمسة ايام:
بالله ياقلبٍ .. ورا الليل ينظام
من ليلة الفرقا ليا نفخة الصور
انسى وخب عْن المحبين الاحلام
اضرب دروب الياس مع فجة النور
يافاتنه " ماعادلك عندي " هيام
جف الامل لين الالم جاك منثور
كنت احسب ان فراقنا خمسة ايام
ياخمسةٍ مرت بها تسعة شهور
العقل :
في خاطري حاجة وفي كبدي الموس
خامس سنه مرت وروحي تعاني
شلت السهم مرات مارَ افخّت القوس
وبروزته لصبح الندا والتفاني
ماني على طاري المحبين مهووس
شيٍ مثل برق السحايب لفاني
اخترت عقلي يوم كل شي مدروس
قبل يتحمل مانطق به لساني
جعلته الريس وانا صرت مريوس
عليه تدقيق الادب والمعاني
النفس مامنها معزه وناموس
والقلب مايدرك خباث المجاني
العقل ماتنعم به افكار هندوس
اللي يعبدون البقر والمباني
صح البشر فيهم من اكرام ونجوس
بس البلا غش المظاهر كفاني
مافيه جاسوسٍ يقول انُه جاسوس
ومابه اناني قال بأنه اناني
كلٍ وقف بالهرج والعالم جلوس
انا الوفي اللي غدرني زماني
والعقل وقفني من القوس للقوس
لو ان طراد المحبه دعاني !!!
شمس وقمر:
ماقصرت شمس الضحى
اللي على البال ، انمحى
ماقصرت ماقصرت
لومي على نصف الشهر وين القمر
ضاع القمر!
ماغطتك غر السحاب
لو غطتك اشره علي
ياخي تعذر بالسحاب ولا على نور وضباب
اهم شي تردلي
وشمس الضحى ماقصرت فيني وانا كنت اجمعه
الغايب اعذاره معه
وشف لك طريق واتبعه
ماقصرت :
ماقصّرت فيها محبه وتقدير
ماودعتني ماتبي لي اذيّه
فيها امل حبيبتي بالمعاذير
ماصوبتني للشقى والاسيّه
ماقصّرت خلت جفاها تياسير
تجفاني شهور وتجيني شويّه
ودعتها اضحك وفيني تعابير
وشلون صار اللي بقلبي خطيّه
قصة النسيان :
سهرت البارحه واثر السهر مايبري المعلول
اطرز من خيوط الشعر مادك الخفوق وجال
انا من وين مالديت عن طاريك يالمجمول
اشوفك مثل برّاقٍ تلاعج بالمساء واختال
تناسا قصة النسيان انت انت اصلاً المسئول
بنيت امال " ورياحك عتيّه " هزت الامال
عليك اللوم ياتارك خفوقي من سنه او حول
عسفت الذكريات الله يسامح قلبي المعتال
عيونك كان سلهمتي .. تقول مصقلٍ مسلول
وجديلك لا انهمر بالكتف والله ماعليه جدال
انا بعد المحبه صرت اجاهد حبك المملول
وثلاث ارباع حبك صد ومكابر وكثر اهمال
ياحيف:
بالهون لاتقسى علي بالتحاسيف
ويلي لو ادري انك كذا مارجيتك
صاحت عليك أيامنا والمشاريف
وانا عطيتك من هواي وبنيتك
ان كان ماحنت لياليك ، ياحييف
انسى وانا ابنسى الهوى يوم جيتك
كنا سوا :
جيتي مثل صبحٍ فهق اسود الليل
وصرتي مثل غيمٍ نشى واستهلي
وطبتي مثل قهوة ضحى والتعاليل
ترسم على وجه الملول التسلي
ورحتي مثل وقت الغروب بتفاصيل
يطول همي فيه لاطال " ظلي
هزيت جذع الليل ماطاح قنديل
كانت نجوم الليل فيني تهلي
كنا سوا نرعى السنين المقابيل
وحدودنا بين الوصل والتغلي
فداك :
فداك الدروب الممحله والتعب والراس
فداك السنين اللي لها رمح سم وخيل
فداك الغصون المخضره واعذب النسناس
فداك القصيد العذب والفكر والتأويل
ملكتك وكان الحلم معزوفه واحساس
لقيتك وصار العلم يالله عطني حيل
عرفتك سوات البرق يتلي لك العساس
لقيتك سحابة صيف ياويلي حالي ويل
انا خابر اني بالمواقف قوي الباس
عرفت الوداع وصرت لاقوة ولا حيل
قلم ينزف جراحه على وجنة القرطاس
يشكل تفاصيل العذوبه سوات النيل
ياليت القلم في جرته يجمع الجلاس
ياليت القلم لو نشتكي له يعدل الميل
ثلاث اشياء :
نجوم الليل والمسرا وخلي
ثلاث اشياء تطري كل ليله
انا اللي عفت من عقبه محلي
يناديني خيالي واستخيله
خليلٍ حيل احبه .. ماحصلي
عسى ربي يعوضني بديله
دعاني مرتين وجيت كلي
وسقاني من شفاه وسلسبيله
همس لي قال مابالكون مثلي
ولاتنسى ليالينا العليله
كل الاشياء مرتين :
يانبيله في شفاهي كلمتين
ليه اشوف الشمس تشرق مرتين
كيف اشوفك كل ليلة في عيوني
أفتكر لحظة دفاك وتشهقين
من سوالفنا وامانينا الكثيره
كل لحظة في ثوانينا مثيره
وقفّت الدنيا على ساق وقدم!
قلت لسى ما أبي طاري الندم
وقفّت الدنيا وقالت لي كلام
صور الحاضر " حكايات وحنين"
قلت والله ماتسمى محاوله
والاماني في ضفاف الطاوله
أقدر اوزع أمل للعابرين
ولـ ألف شاعر
فكرتين
وبسمتين
كل حاجة يوم جتني كلها
صارت الاشياء بعيني" مرتين"
لو اضمن الحب :
الليل هذا رهيف ونسمته تسكر
وانا معَ هاجسي والقهوة الساده
ارقى سفوح الاماني والامل ازهر
دربٍ تمنيت طول العمر ارتاده
حبيبي اللي ترنم لي ويتمخطر
حسنك يجود الهوى فالقلب ميراده
هذي السماء العاليه تهدي لك المنظر
باقي تطيح النجوم فـ عنقك قلاده
من يوم حبيتك وطعم الهوى سكر
قبلك وطاري الهوى ماحب نشّاده
لو اضمن الحب حبيتك بعد اكثر
شوفي وانا ضامنك بحبك زياده
ياسقى الله :
مرحبا والليل توه عسعس وهب بنسيمه
ثلثه الاول دهلني الضيق بالجنب الرهاوي
قانعٍ باللي حصل من قو ماذقت الهزيمه
اشهد ان الشوق وجهٍ ماتهيا بالغناوي
بالمنافي سقت حلمي بمشهد ايامٍ قديمه
ياسقى الله يوم انا هايم معه في كل وادي
ياسقى الله يوم كان غيابها ليله جريمه
ياسقى الله ليلةٍ يرضي بها القلب الشقاوي
وش جراله يوم ذوقني المراره والظليمه
انده وليلي كدر وادف براق الرجاوي
انطويت بغربة احلامي ويصلاني جحيمه
والعوض شعرٍ كتبته فيك ياعين المهاوي
انطويت عن الجماعه في ظروفٍ مستديمه
خوف من سجات قلبي لاتبيّن بالبلاوي
جافي الاصباح وانفاس المطر ماشفت غيمه
في رجا لقيا الحبيبه ليتها بالحال تاوي
ماسلمت وعلتي قشرا وطيحاتي اليمه
السلامه راس مالي وطيحتي وانا متساوي
لاتقوين الاماني :
ياغريبه " لاتقوين " الاماني
الاماني غاية الهم وطروقه
سولفي لي عن كتاب الاصفهاني
اي حاجة غير هالهم وحروقه
عن قديمات وجديدات الاغاني
عن هماليل المطر ولا بروقه
استبحتي القلب بالذكرى عشاني
كنت مستهوي الوصال وما اذوقه
ياغريبه" اتركيني " بالمعاني
شاعرٍ تركض له الخيل السبوقه
لاتحسبين الوجع بالحيل عاني
اوجع من الجرح من فتش فتوقه
اينا اللي ساعيٍ بالوصل عاني
عاني وماوافق العين الشفوقه
لا محبه ولا الزمن هذا زماني
المنافي غاية الكيف وطروقه
رحلة عمر:
في رحلتي كْنت مِثل الطَائرٌ الشادي
وآستوقفتني ثِياب الغاشمٌ العادي
في العشر لم اُدرك الاشياء من جهلي
كانت تجيء لنا بالمسك والكادي
رافقتُها عاشقٍ مابثه المسكٌ
ترخي اللثام فتعطي جوها الهادي
لما رأتني بلغت العمر قالت لي
مني سلامً وماعادتَ لإإنشادي
كنا سوياً نجوب الدار قاطبةً
ياحسرتي أين لقيانا بميعادِ
محالتةٍ تغري الهائم بفتنتها
جمَالها لايضاهي كل أعيادي
هل عاثت الخلُق من جمالها الفائق
ماذا ولو هي التي من حارب أجدادي
حاربتها بأسم رب الكون معتدلاً
أقمت فيها الصلاةَ وأهتنى زادي
هذي بلادي وهذي الشمس تشرقها
وهذا قصيدي وهذا يوم ميلادي
الهوا غلاب:
حبيبي تقـدر تكـابر
ولـكـن الـهـوا غلاب
تعال ليا مـتى صـابر!
وانا يامنيـتي مـرتـاب
حبيبي تكسر الخاطر
جروحٍ مـالـهـا اسباب
مـدام انـك علي قادر
عصي الدمع ماينتاب
حبيبي شـفـتك تكابر
صحيح ان الهوا غلاب
الاطلال:
البارحة " اقرا تبارك " والانفال
واليوم عن ليلى اترجم شعر قيس
استغفرالله " كان غنيت " موال
من بعد مارتلت صوتي باحاسيس
يالله قفا نبكي على راس الاطلال
مادام " سكتنا بلاها " الفوانيس
وان مرني هدهد سليمان بالبال
ماقلت له وصل جوابي لبلقيس
سلام يادمث النحر واسود الشال
سلام يحمل عطر لندن وباريس
ماردني " عنك مواصيل " جوال
لو حال مابيني وبينك متاريس
وان حدني شلفا ذيابٍ عن المال
ماطحت وانا اذكر عيونك نواعيس
في وسط عينك مال قارون سيال
يمشي على خدك وحنا مفاليس
تدري قفا نبكي على راس الاطلال
ونمشي " بسكتنا بليا " فوانيس
وشلون بنسى:
ليلٍ " طويل وقصة " العامريه
حطت قبال العين ترنيمة الياس
وشلون " انسى بسمة " الشمريه
والضحكة اللي باول العام ياناس
ماعاد " تبري شيلة " السامريه
القلب من كثر التفاكير محتاس
ان جاء النهار وجفّت الهاشميه
حطو قبالي الياس واحارب الياس
عن الملك عبدالعزيز :
البارحة جالس وحيد
قلت أسأل الجدران وأفكر وأفكر واستفيد
عن موطني : قالت تعال
موطنك له مجدٍ تليد
..
رح واسأل الشمس وتعال
كانت لهم عز وظلال
كانت لهم تسوى كنوز الصين وانهار العرب
والعيلم الراهي يغرفونه نشيد
..
قلت القمر؟ قالت دليل
للتاية المنجوم ليل
والحنشلي يدبهّ سيفٍ لمعته
تعكس سنا ضو القمر
تعكس سنا المجد التليد
..
حتى البحر حتى النفود
الرمل قطعة من فشق والبحر ارضٍ من عذاب
للمعتدي لاطق عود
يامال وحداء وقصيد
..
قلت اصبري انا أسال الجدران قالت وش تبي!
قلت ان هذا مطلبي
قالت اجل بعطيك حل
اسأل بيوت الطين تخبرك الحقيقة والمزيد
صدقتها لكن بيوت الطين مافيها صدى!
قالت بها العلم الوجيز…
اصرخ لها فـ أقرب مدى
على الاقل اخذ الوجيز
ابي أسأل عُن المملكة وامجادها
قالت وتلفظ بالنفس امجادها " عبدالعزيز "
هو ذروة المجد التليد ..
قديمة جداً بدون عنوان:
ياليت " لو " الوّ حبرٍ وقرطااس
عدلت فيها " بالقريحة " مسيره
طبنا من الدنيا بعزٍ " ونومااس
ولذاتها في " كل " يومٍ .. نثيره
قد قيل ان الناس تفرق واجناس
واليوم جنس الخبث صارت كثيره
صرنا نحصل منها شر وافلاس
وتعطي الكذوب الخير من دون خيره
ولاعاد ياهل الشعر للشعر اوناس
تكاثروا " شعااار " شبه الجزيره
وكل يفل احساس والكل حسّاس
من نسج روسٍ للكذب " مستديره
هذا سرق فكره وهذا شذب نااس
وهذا " خرابيطه " لهونه جديره
والشعر لولا اصدقهْ ماكان مقياس
على البنادم عند " جرع " المريره
والشعر لو هو عين ! نامت بالادماس
ولو هو عمى ؟ والله تقوده بصيره
الله يقطع كل " كاااذب " وخناس
عن الحياة .. وكل حااااجه نصيره
مابه صباح الا صباحات نسنااس
من لطفها تحيي النفوس الكسيره
لاخايلت عيني النباتات " وافراس
تركض ، كأن الصبح نعمة قصيره
والغيم لادف المزن ، هاجر الياس
كنه يعاف هدوء مجرى خريره "
ابكي على الاطلال وابكي على الناس
شالو ملذات " الحياة " الكبيره
احن للاشجار من حدة الفاس
وابكي لـ عصفوره لاصارت اسيره
ومابه مساء الا مسائات الادمااس
اللي نجومه " ضاوياات " وكثيره
واليوم من بعد الشوارع والاكباس
الليل هذا صار " مثل " الظهيره
ماجيت من دور المهلهل " وجساس
ولا ابن " كلثومٍ " ولا ابن المغيره
عشت التفاصيل القديمه بهوجاس
وعسيتها لكن باطراف ، ديره
وقتٍ يطمن شيخ ويرفّع خساااس
ودجالها به " صار " ابو هريره
لازم نسايرها والاريااق يبااس
على مسيره مانعاكس ، مسيره
ويا ام العيون وكن في عينها نعاس
محتاج انا مَ احتاج بالغيد غيره
ومحتاج صوتك استمد منه الباس
واقول عن كل اللي يبي يصير خيره
ضميتها بقلبي ورا حدب الاقواس
وحتى توسدت ، الخيال واثيره
عجلٍ على لقياه والحال محتاس
ودريشة الاحلام اسمع صفيره
وباب الامل دونه وساويس جلاس
ويرتاب شوقي حين يسمع صريره
من حبها لي شدت الحب بالسااس
والله يدري بما " تكن " السريره
بنت الرجال " متعبة كل عرماس
على ظهور المسرجات ، المغيره
ماعاد لي في موطن العرب مجلاس
وين الضمير اللي يحس بـ ضميره
على العموم الله على شربة الكاس
من ريقها الحالي " علاج المريره
انام لكني على " صوت " الانفاس
انفاسها تسوى رجاااالٍ " كثيره
قولي احبك ، ينتفض طير الاتعاس
عن صدري وتطرد بقايااا خطيره
ان غابت تحذر من الغيد والناس
وانا لك الله " مابي " شوف غيره
اينا:
ليلة البارح مسافاتي طويله
كل ذكرى جت على بالي امره
ياحبيبي لو تحملت الثقيله
ماعلى الدنيا ثقايل مستمره
اينا اللي جرح قلبه من خليله
واينا اللي يوم جيتي ماتشره
واينا اللي بالصبر يلقى حصيله
ضيقةٍ تستاسع بحجمه مجره
انت طوّح كبرتك باية وسيله
كبرةٍ ماشفت منها الا المضره
الهوا مايرحم:
ويافاتنه ... حنا وساع البنايد
ماِر الهوا مايرحم ان جاله جنون
انتي " تذري بي نهار " الشدايد
وانا اتدثر بك اذا صرت مشحون
بالحب ما اضرب على كل كايد
كم خيّرٍ قلبي شكا الذل والهون
ادرا الخمال وشوف حر النكايد
واصبر صبر بيدا على غرة مزون
سابع المستحيلات:
ياللي كلامك خير صب الصباحات
في صدر مسقيه العنا كم قرطوع
ماهو طرب لادندن القلب الابيات
الا وقلبي من عنا الشوق موجوع
لو حبتي للكوع " تصنع " مسرات
لا أحب كوعي " لو على كسرة الكوع
ولو " المسرة " فوق روس الطويلات
ارقى لها " بالعين " وتضمها دموع
ولو المسره " برق " فوق السموات
عساسها من وين مالاح . ؛ متبوع
مسرتِ من " سابع " المستحيلات
الا بخلٍ عوّض سنين ب أسبوع
جمود القريحة:
فالبال شعرٍ كيف اخليه مكتوب
اذا بزغ " نور القلم طاح " دوني
حبيبتي والامر ان كان مغلوب
انتي بخيصه في خوافي شجوني
حبيبتي مايزهر النبت بغروب
لو جاه من سود السحايب مزوني
هذا انت ياشمس الضحى انشيت عذروب
غيّبت يوم ان الشعر وده يكوني
احيان احس اني على الشعر مغصوب
واحيان شعار العرب يحسدوني
اعطيه عقل الذيب وقليب نبنوب
واسلم وجيه القرايح حزوني
اعطي الامل دايم مواعيد عرقوب
اشياء في صدري تجرح جفوني
وين انت ياللي جاعل الشوق لاهوب
ادبرت يوم الصبح غنا لحوني
اشياء " ماتدري بها بنفس " يعقوب
بس انت عطني من قميصك عيوني
انا مثل ذيك الورود :
مثل الورود
الذابلة كل امنياتي والامل
عشمّت نفسي ؟ بـ الحيا
الين شح بوابله
هذا انا ؛
لاتحسب ان صبري مثل
صبر الجمل
انا مثل ذيك الورود
اللي بقلبي ذابله!
مشهد ساخر:
تقفّونا هل النمّه بدون ازعاج
يحطون الردى فينا من الاخر
وطويلات الليالي تكسر الافواج
وذولا مالهم بالمرجله ذاخر
مسلسل مايبي له قصة ومونتاج
نشوفه بالنوايب مشهدٍ ساخر
عن الظنون:
صهيل والبرق يبرق والسماء دن
واذكر مساعد عسى ربي يبيحه
من قال له كان ضاقت دنيتك غن
يقول هالخلق مقروده شفيحه
جداي اخيط الجوارح يوم صبن
والدمعه المحكمه دايم كليحه
من شب نار الظليمه فيه شبن
من يضمن الموت نفسه مستريحه
حلاة من يضرب السكه على فن
تكفيه عن لذة الدنيا ، طليحه
بشعاب حايل سهولٍ تشبه البن
ودك تزعفر اراضيها الفسيحه
والضلع له قصةٍ بالانس والجن
سوالفٍ تطرب وجيهٍ فليحه
ماضاق صدري من اهل السو والظن
اللي مثل ضحكة الداب وفحيحه
شريتها كني العب وادبل الصن
الراحه اللي غدت رهن القريحه
الراعبية:
وش له تنوح الراعبيه على الصبح
وجنحانها لو ستلت طيّر غبار ؟
ماتعرف ان جنحانها راحه وربح!
ليه ازعجتني جعلها صالي النار
حتى الجموح اللي لها بالوطى ضبح
ادرك " امانيها" سموات واسفار
اكبح جماح النفس عن ماتبي كبح
وعيّت تطيع الشور من كل الاشوار
اعماقها " من العام " مذبوحةٍ ذبح
بلوى بلا الله من بلاني الافكار
الكلب دام اقصى مواصيله النبح
حدّه قبل بسّام الاصباح يندار
اعرف بعيد الشبح وقريّب الشبح
وجهد الضمى اهون من مجاهد امرار
خله "تنوح " الراعبية على الصبح
وجنحانها ؟ ياجعلها تمتلي غبار
زهرة شبابي:
ليه اكبر وعمري بدا يصغر شوي
يعني كذا زهرة شبابي تبيني
في معقل الاحلام كان الامل حي
لين الصباح العذب جاوب حنيني
انا ولد طيٍ وهي سابقه طي
حفاوة وليل الهنا يحتريني
ابطى علي النبّت وان شعشع الضي
ينبت مثل فتنة هدبها بعيني
مهره نواصيها تلافح على الضي
ياكنها بين السحايب وبيني
مارضيت الهون:
ابتدا الليل وسجى ماهب مع بارد ضبابه
خابرٍ بارد ضبابه يهف عن صدري هشيمه
اثقل من طويق وجبال السروات وهضابه
حاجةٍ دلت تموح الصدر في ارضٍ وخيمه
ومن ثمان شهور مامرت على بالي سحابه
وكان مرتني ، تعدت ماعطتني اي قيمه
ماغدت نفسي تدور عن شواردها نهابه
ان نهبت شداد ريمه وين ابلقى مثل ريمه
مستلجٍ بالحشى شيٍ وفي وجهي شحابه
وضحكةٍ ماتسعد الشامت علي ولا تظيمه
سبعه وعشرين عام ادركتها وكلي رحابه
احمدالله يوم لي مبدا ولي فالنفس شيمه
والله انه لو سعادة روحي ببعض الطلابه
ماطلبت الا الله اللي جود مداته عظيمه
وان حكى بّي البغيض الله لايسقي جوابه
ويتبعه من يشبه لشقرا مثل شقرا بهيمه
مارضيت الهون لكن ضقت من جور الكتابه
عارفٍ قدري ونفسي مار ياشين الظليمه
اهتديت بما انزل الله بالكتاب ، وصرت اجابه
وردني عن بعض خلقه سلم ربعي والحشيمه
الى هنا أكتفي ..
تعليقات