خالد ملاقي الشمري
دورات السنين
الوقت نفسه كل ما جد ينعاد
تعيد دورات السنين التفاصيل
ينعاد تاريخ العرب هي والاضداد
وبالجيش والحكمه وبالعدل والميل
والشعر يتجدد ولا يعطي جداد
مثله مثل زرعٍ جنوبه محاصيل
تطيح كسرى وينتهض سور بغداد
ولاشك نعرف من يحطم اسرائيل
والمرجلة لو شربّوها بالاحقاد
تبقى لسمحين الوجيه الحلاحيل
طواريٍ كل ما اسهب البال تنقاد
تقرا بها التاريخ جيلٍ بثر جيل
قلت اتمشى واترك الهم من غاد
من خوف يسري بي النيا والبهاذيل
وقفت اناظر في منازيل الاجداد
اللي عليهم دمع عيني هماليل
ماباقيٍ فيها سوا صوت الامجاد
واقفت مع ركابة الجيش والخيل
مما جرا فيهم رعد بي رعّاد
يحط في صدر المشقّى غراميل
نصيبهم روّح مثل ريح الانفاد
ليا سفى واخفى مسير الرجاجيل
ماكنهم عانو على لقمة الزاد
واللي جمع من بعد عسرٍ وتنكيل
اموالهم راحت نصيفه للاحفاد
وراحت من الاحفاد يسر وتساهيل
مما جرا فيهم لنا فيه ميعاد
ويالله عسانا بالمكارم رجاجيل
كل يوم نفس الدايره بي تنعاد
يمشي بي الهاجوس ممشى المحاميل
نصاح؟ مدري ياهل العرف نشاد؟
مدري ولا لي شي غير انظم القيل
ذي عاادتي دايم وانا صرت معتاد
اسج واذكر حالتي بالتفاصيل
واعوذ باللي باسط السبع باوتاد
واعدل شماغي واصف الفناجيل
خالد الشمري ...
10 ديسمبر 2024
تعليقات